80 ka pamilya palayason tunnel sa SRP

Ang kapin sa 80 ka pamilya nga nagpuyo diha sa daplin sa McArthur boulevard gihinay-hinayan na sa pagpadala og mga notices nga nag-awhag kanila nga mobiya na sa giistahan aron masugdan na ang pagmugna og exit sa tunnel gikan sa SRP.

Si Major Vicente Mercado, hepe sa City Hall demolition team, namahayag nga siya maoy gitahasan sa paghatag og mga notices ngadto sa 89 ka pamilya kang kansang panimalay, sagad mga barong-barong anaa gitukod sa daplin sa McArthur boulevard.

Gisusi karon ni Mercado ang impormasyon nga kining maong mga pamilya diha sa daplin sa McArthur Blvd. dugay na diay nga nabayran aron mamahawa na sa ilang giestahan, apan wala gihapon mamahawa sa maong dapit.

Ang tunnel nga maoy agian sa mga sakyanan nga gikan sa South Reclamation Project anha molagbas ilawom sa Plaza Independencia aron nga dili maguba ang kabililhon sa maong dapit nga giisip nga usa sa mga tourist attraction sa Sugbo.

Duna hinoon mihulagway nga gastoso kaayo alang sa kagamhanan ang pagmugna sa maong tunnel nga maoy agian sa mga sakyanan gikan sa SRP coastal road.

Kini tungod kay kinahanglan pa man nga butangan unya og water pump ang tunnel aron ang tubig nga mosulod gikan sa SRP, masuyop og ibugwak sa gawas sa tunnel.