Pensyon sa GSIS di na malangay

Gisulbad na sa gobiyerno ang kaguliyang sa mga pensionado sa GSIS bahin sa kalangay makuha sa ilang tseke kada buwan.

Matud pa ni Mitos Galicinao, tigpamaba sa Government Service Insurance System GSIS - Cebu nga gilusad nila ang "Pensioners' Day" (PD), diin sa maong adlaw ipanghatag ang tanang tseke sa mga pensionado diha sa opisina sa GSIS.

Sa sayo pa puwerting gubota sa mga pensionado gumikan sa pasalig sa taga GSIS nga ipadala na lang ang ilang mga tseke pinaagi sa post office.

Apan kasagaran sa mga pensionado mireklamo kay matapos nalang ang buwan nilag pinaabot, wa man gyuy tseke sa pension nila ang moabot.

Maoy hinungdan nga matag adlaw mag-abot ang daghan kaayong mga edarang pensionado diha sa opisina sa GSIS nga naghatag usab og labad sa ulo sa mga opisyal sa maong ahensya.

Sa buwan sa Septembre, sa petsa 1 ug 2 sa maong buwan ang mga adlaw alang sa PD sa mga pensionado diin ang dili makatungha ug dili makadawat sa ilang tseke sa maong mga adlaw, ipadala na lang pinaagi sa post office.

Matud pa ni Galicinao, nga human mapakyas ang ilang buhatan sa pagpatuman sa sistemang ipadala ang mga tseke ngadto sa panimalay sa mga pensionado, mihimo sila og survey.

Sa maong pagsuhid, nasayran nga sa 9,587 ka mga pensionado sa Cebu, 3,000 kanila ang mipabor nga ipadala lang ang tseke pinaagi sa pahatanan.

Apan ang 5,000 kapin misupak kay daghan kaayong hinungdan nga malangan pag-abot sa ilang balay ang ilang mga tseke kay masabod pa kini diha sa mga post office gumikan sa nagkalainlaing katarungan.