Dako'g ikatabang

BOHOL - Dako ang pagtuo ni Kongresista Edgar Chatto sa unang distrito sa probinsya sa Bohol nga makatabang sa kalamboan sa patigayon sa turismo ang daling kahumanan sa tugpahanan diha sa isla nga lungsod sa Panglao.

Si Kongresista Chatto miingon nga si Presidente Gloria Macapagal Arroyo mipasalig ngadto kaniya nga hatagan gayud sa iyang administrasyon sa igong pagtagad alang sa kahumanan niini.

Midugang si Chatto nga sa pagka karon nahimong inila ang probinsya gumikan sa maanindot nga talan-awon niini.

Nakita usab ni Chatto nga nakadani kini pag-ayo sa mga turista.

Apan siya mipasabot nga kinahanglanon na gayud karon sa probinsya ang usa ka halapad nga tugpahanan.

Samtang adunay karaan nga tugpahanan nga nahimutang sa dakbayan sa Tagbilaran apan alang kang Chatto dili na kini makatubag sa panginahanglan sa nagkadaghan nga pasahero.

Si Chatto miingon nga nalipay siya nga si Presidente Arroyo nakakita niining maong problema sa probinsya.