Sipang buto nga mitay-og sa yuta nakapa-alarma

Ang kalit nga pagtay-og sa yuta nga namugna sa kalit kaayong buto nga gituohang usa ka bomba o abyon nga nahagsa nakapaukay gayod sa mga lumolupyo sa mga lungsod sa amihanang bahin sa Sugbo.

Naglakip sa mga lungsod nga nakasinati sa maong pagbuto mao ang Tuburan, Tabuelan, Medellin, Sogod, Borbon ug uban pang silingang kalungsoran.

Sa pagpakighinabi nga gihimo sa Banat News kang Orlando Montanez, science research specialist sa Phivolcs nga nagbase sa Lapu-Lapu, giklaro niini nga dili linog ang nasinati sa mga lumolupyo sanglit walay narehistro niini sa maong adlaw.

Si Cebu Provincial Police Director Vicente Loot nga nakadawat usab sa maong hitabo mimando sa mga hepe sa kapolisan sa nahisgotang mga lungsod sa pagsusi sa tagsatagsa nila ka hurisdiksyon.

Si PO3 Joenard Luyao sa kapolisan sa Tuburan Police Station nga gikahinabi sa Banat News miingon nga daghan ang mihimo og pakisusi sa ilang buhatan human masinati ang kusog nga pagbuto.

Matud pa niya nga sa sulod siya sa ilang panimalay sa Poblacion sa maong lungsod dihang nasinati nila ang kalit nga pagbuto apan naglisod usab sila sa pagpasabot sanglit lakip usab sila nahingangha sa maong hitabo.

Si PO3 Jose Cejano sa kapolisan sa Borbon nga gikahinabi sa Banat News miingon nga nasinati usab nila sa ilang dapit ang lanog nga buto nga nakapatay-og sa yuta.

Samtang si PO3 Paquito Sun sa Medellin Police Station nga gikahinabi sa Banat News nga mikompirmar usab sa nasinati nilang pagboto sa maong dapit ug miingon nga maoy ilang pagtuo nga gikan sa usa ka abyon milabay sa kawanangan sa maong lugar.

Dugang pa niya nga pipila ka lumolupyo nga ilang gikahinabi miingon nga nakakita kini og puti nga naglupad sa kawanangan nga kalit lang miboto.

Show comments