2 tawo nag-assemble og dinamita gisikop

Dinamitang hinimo nakompiskar sa kapolisan ug duha ka tawo nga nag-assemble niini nasikop didto sa Suba-Basbas, Lapu-Lapu sa milabay'ng adlaw.

Ang nasikop mao ang mag-agaw nga Siano Caburnay Cabaltera ug Sixto Caburnay Laperta, pulos nagpuyo sa Sudtungan, Basak, Lapu-Lapu.

Base sa imbestigasyon sa kapolisan sa dakbayan sa Lapu-Lapu nasayran nga usa ka concerned citizen ang nanawag sa presinto 4 ug mipahibalo kanila nga dunay nagsagol ug naghimo og mga improvised nga dinamita hinungdan nga girespondehan kini.

Atol sa pagresponde nila ni PO1 Janranger Espino ug PO1 Reynaldo Tañaca Jr., naaktuhan si Cabaltera ug Laperta nga misugkay sa mga sagol sa improvised nga dinamita.

Nakuha sa posesyon nilang Cabaltera ug Laperta mao ang sagol nga sulfur, potassium nitrate, pito ka pabilo, tin can nga gihimong sukdanan, duha ka atsa ug duha usab ka maso lakip na ang bara de kabra nga gamit sa pagbuak sa mga bato.

Base sa impormasyon nga nahipos sa kapolisan sa dakbayan sa Lapu-Lapu posibleng nalambigit ang mag-agaw sa pagpabuto og mga bato gamit ang dinamita o pwede usab kini nga gamiton sa ilegal nga panagat.

Gumikan niini, gipangayuan ni PO1 Espino ang duha ka suspetsado og mga papeles sa ilang paggama sa maong improvised nga dinamita, apan wala kini makapresentar hinungdan nga kini gisikop ug gibalhog sa kapolisan sa Lapu-Lapu.

Ang mga ebidensiya pormal nga gisumiter ngadto sa PNP Crime Laboratory alang sa dugang paghiling niini samtang giandam pa ang kasong kalapasan sa Akta Republika 8294 sa paggama og improvised nga dinamita nga walay pagtugot.