Si Felipa Solana, hepe sa Department of Social Welfare and Development (DSWD) sa siyudad mibutyag kagahapon sa Banat News nga kining 200 ka tawo miduol sa ilang buhatan aron mangayo og tabang aron ipalit og tambal tungod kay napaakan og iro.
Matud ni Solana nga matag adlaw adunay usa ngadto sa upat ka pasyente ang napaakan og iro lakip na niini mga bata ang mangayo og hinabang tungod kay dili makaabot og palit og vial sa anti-rabies.
Ang maong vial nagkantidad sa P1,400.00 apan adunay mahalon niini nga P6,000.00 ang kantidad nga maoy i-injection sa mga pasyente nga napaakan sa iro sa ibabaw'ng bahin sa ilang lawas.
Samtang ang kakuwang sa ekipo maoy girason sa Talisay City Veterinarian maong wala sila makaaksyon sa maong problema.
Sukad sa buwan sa Mayo hangtod sa Agosto adunay 18 ka request ang giduso diha sa buhatan ni Galileo Larawan, City Veterinarian sa siyudad nga magpa-impound sa ilang iro ingon man ang mga iro nga maglibod-suroy nga makit-an.
Si Larawan mitug-an sa Banat News nga wala silay sakyanan nga magamit para makargahan sa mga iro sa pagkakaron sanglit ang nag-inusarang multicab duha na ka buwang naestambay sa shop tungod kay gubaon kini.