Selebrasyon sa Akrho namatyan og sakop

Selebrasyon sa ika-33 ka tuig nga kasumaran sa Alpha Kappa Rho fraternity mibuhis og usa ka kinabuhi ug miangol og usa nila ka miyembro dihang usa ka wala mailhing tawo kalit nga mipusil sa duha diha sa dalan Panganiban, Kalubihan ning dakbayan kagahapon sa hapon.

Gideklarar nga patay nang midangat sa Cebu City Medical Center ang usa ka sakop sa Akrho nga naila lang sa pangalan nga Glenn nga taga lungsod sa Balamban.

Samtang ang samaran mao si Albert (tinuod ngan gipugngan) 16, taga Barangay 6, lungsod sa Tuburan kinsa nakadagan human makit-ing gibirahan ang iyang kauban apan una pa siya makalayo gipusil sab siya sa suspek.

Si Albert sa pakighinabi sa Banat News mibutyag nga padulong na sila moadto sa terminal aron mosakay pauli sa ilang mga lungsod dihang usa ka wala mailhing lalaki nga gibana-banang nag-edad og 20 ngadto sa 25 anyos ang misunod kanila.

Dihang nakasikit kanila ang suspek pag-abot sa eskina sa Sanciangko ug Panganiban kalit mibunot og wala matinong kalibre sa armas ang suspek ug gidul-itan og pusil ang iyang kaubang si Glenn diha sa tuong tampihak makausa.

Matud pang Albert dali siyang midagan padulong sa Natalio Bacalso apan gipusil siya sa tawo nga nakaingon sa pagkaigo sa iyang walang bukton.

Si Albert nagkanayon nga gikan sila mitambong sa usa ka bilar ug nagsabot nga manguyog sa panon sa Akrho diha sa caravan kagahapon apan gikatahong nabiyaan sila sa grupo.

"Mamauli nalang lagi unta mi kay basin dunay samok , mao man ni hinuoy nahitabo namo," asoy pang Fuentes.

Si SPO3 Alex Dacua ang imbestigador sa Homicide Section mibutyag nga wala pa matino kung si kinsa ang tawong mipusil sa mga biktima. "Duna mi nakuhang impormasyon didto sa crime scene nga gikan kuno nanakay ni'g dyip ang duha unya nagara-gara lagi kuno kaayo nga nangapyot, kiat kuno kaayo," asoy pang Dacua.

Dunay nakuhang usa ka linikit nga marijuana ang kapolisan sa lawas ni Glenn ug usa ka kutsilyo gikan kang Albert.

Ang Akrho dunay gipahigayong caravan kagahapon nga giubanan sa gatusan nila ka mga miyembro nga milibot sa dakbayan.

Si Supt. Melvin Gayotin ang acting director sa Cebu City Police Office mimando na pag-deploy og dugang mga polis sa palibot sa dakbayan nunot niini.

Sumala pang Gayotin nga dunay gisitar nga sakyanan sa mga Akrho kagahapon gumikan sa overloading, gani pipila sa ilang mga miyembro nagpabuto pa diha unahan sa gate sa CCPO.

Daan nang mipasalig si Richard Buscaino ang presidente sa Akrho dinhi nga mosunod sa lagda sa trapiko ang iyang mga sakop atol sa maong kalihukan apan miklaro nga dili gyud nila mapugngan kung dunay laing tawo ang manghilabot sa ilang mga miyembro.

Si Buscaino sa pakighinabi sa Banat News kagahapon nahibulong nganong dunay mga miyembro nilang nabiyaan nga duna man untay koordinasyon ang matag tsapter sa kalungsoran.

Dugang pa ni Buscaino nga iyang tabangan ang duha lakip na ang pagpahimutang sa patay'ng lawas sa namatay.