Matud pang Sr. Supt. Jorge Corpuz ang director sa CIDG7 nga di na sila mopasaka og kaso batok sa konsehal, kini maoy abogado sa usa nila ka mga suspek nga si John Sanchez.
Kagahapon sa buntag dunay komperensya ang CIDG7 ug nadesisyonan nga di na mosang-at og reklamo batok sa konsehal ug isipon nalang nga leksyon ang nahitabo.
Matud pang Corpuz sa Banat News nga mao pa kini ang labing unang higayon nga dunay usa ka opisyal sa gobiyerno nga miinterbiner sa ilang operasyon sukad nga masukad.
"I consulted them (mga sakop) only to find out that this is the first time involving an intervention by a public official," asoy pang Corpuz ug midugang nga sa sunod nga operasyon di na sila motuo sa bisan kinsang tawo.
Niadtong Lunes si Carillo mibisita sa CIDG7 aron pagtino sa kasong gikalambigitan sa iyang kliyente nga si Sanchez kinsa maoy tag-iya sa Yu Lian Marketing nga gironda.
Kusganong gipanghimakak sa konsehal ang pasangil nga miinterbinir siya sa operasyon sa CIDG niadtong Biyernes.
Matud pa niya igo lang siya miesplikar sa iyang kliyente kung unsay unod sa search warrant ug mibiya siya dayon sa dapit. Apan ang CIDG team leader niadtong tungora nga si Chief Inspector Jacob Macabali nagkanayon nga dihang ila nang dad-on ang mga suspek nga sila si Sanchez ug Ke Gingy ug Ben Dy mitawag sa telepono si Carillo ug mipasalig nga siya nalay modala sa mga suspek ngadto sa CIDG7.
Apan niadto pang Lunes nag-abot si Carillo ug ang mga opisyal sa CIDG gumikan sa rason ni Carillo nga sirado ang CIDG niadtong Biyernes sa gabii pag-abot nila ug niadtong Sabado sa buntag walay polis nga miatubang kanila.
Hinuon mipadayag si Corpuz nga andam nilang atubangon kung mopasaka og kaso kanila si Carillo sanglit andam usab silang mopresentar sa ilang habig.
Si Carillo sa pakighinabi sa mga tigbalita kagahapon subling miinsister nga wala siya mointerbiner sa operasyon kay igo lang siyang mibarog isip manlalaban sa mga suspek.