3 Tsino may pekeng CP susihon sa BID-7

Ang Bureau of Immigration and Deportation - 7 mo-imbestigar sa kasong administratiba sa tulo ka mga Tsino nga nasikop sa kapolisan human kini nalambigit sa pagpangilad sa mga Sugbuanon sa milabay'ng mga adlaw.

Sa pakighinabi sa Banat News ni BID-7 regional director Geronimo Rosas kini mipadayag nga silay moimbestigar sa kasong administratiba batok nila ni Lun Xu, Ri Luang Xu ug Hua Xing Xu, mga lumad sa Guandong, China gumikan sa ilang kalambigitan sa pagpamaligya dinhi sa nasud og mga pekeng cellphone nga walay working visa.

Matud pa ni Rosas nga base sa ilang mga dokumento nakasulod kini sa nasud pinaagi sa 'temporary visitors visa' nga giisyu sa embahada sa Pilipinas didto sa China ug gumikan niini silay adunay katungod sa pag-imbestigar sa kasong administratiba batok sa tulo.

Kun mapamatud-an ang tulo isipon sila nga 'undesirable alien' ug dili na makabalik dinhi sa Pilipinas gumikan kay blocklisted na kini sa imigrasyon.

Hinuon, sa kasong kriminal, ang mga tinugyanan na sa kapolisan sa Sugbo ang mohimo sa laing proseso sa pagmatuod nga ang tulo nalambigit sa pagpangilad sa mga Sugbuanon.

Gani ang mga suspetsado nag-atubang na karon og kasong estafa sa Article 315 sa Revised Penal Code.

Kahinumduman, sa milabay'ng buntag sa domestic departure area sa Mactan Cebu International Airport nasikop si Ri Luang Xu ug Hua Xing Xu diin buot unta kini mosibat dinhi sa Sugbo apan sayop ang ilang giagian diin inay sa international departure area, didto sila moagi sa domestic departure area.

Atol sa pagkadiskobre sa mga sakop sa Police Center for Aviation Security-7 pinaagi ni Fernando "Bong" Emanel ang duty x-ray operature nasuta nga adunay 163 ka mga cellphone nga gisulod sa usa ka trolley bag.

Sa paghiling sa maong bag nakuha usab ang 120 ka mga cellphone battery stickers, 135 ka mga cellphone stickers ug upat ka charger.

Samtang si Lun Xu una nang nasikop sa kapolisan niadtong milabay'ng Martes sa hapon human kini makita ni Atty. Franklin Camasura nga usa sa biktima sa pagpangilad sa maong Tsino ug kasamtangang gibalhog sa buhatan sa BID-7.

Matud pa ni Rosas nga iyang paabuton ang lakang sa Criminal Investigation and Detection Group-7 nga maoy misikop sa duha ka Tsino kun ila ba kining itugyan ngadto sa BID-7 ang ilang kustodiya.