Tsino nangilad ni atty gidakop, gibalhog sa BID

Usa ka Chinese national nga nangilad sa abogado pinaagi sa pagbaligya og peke nga cellphone giunay og padakop ngadto sa kapolisan ug gitugyan sa Bureau of Immigration and Deportation (BID-7) samtang laing duha pa ka kauban niini ang padayon pang gipangita.

Ang biktima mao si Atty. Franklin Camasura, lumad nga taga Pajo, Lapu-Lapu.

Ang nasikop mao si Xu Lun, usa ka Chinese national nga bag-o lang miabot dinhi sa nasud.

Base sa reklamo ni Camasura samtang nagkaon kini sa usa ka kan-anan atubangan sa simbahan sa Sr. Santo Niño sa Osmeña Boulevard, si Xu miduol kaniya ug mitanyag sa iyang gibaligya nga cellphone sa kantidad nga P6 mil.

Gipakita ni Xu ang nahisgutang cellphone nga adunay camera nga nagkantidad og P15 ngadto sa P20 mil, apan gihangyo kini ni Camasura og P4 mil.

Human misugot si Xu sa maong kantidad nagbinayranay sila sulod sa Colonnade Mall. Sa dihang gipatan-aw sa usa ka technician sa cellphone ang bag-ong napalit ngadto sa suspetsado nahibulong si Camasura nga miingon ang technician nga way sulod nga mga major parts ang maong cellphone ug kini usa lamang ka dummy.

Atol sa pagtan-aw sa mga balita sa telebisyon iyang nakita si Xu nga nasikop sa kapolisan sa Punta Princesa hinungdan nga iya kining giadto apan gibuhian na kini sa mga polis.

Sa dihang nakita ni Camasura si Xu nga naglakaw sa may dalan Pelaez sa downtown area, wala kini maglangay ug iya kining gipadakop ug gi-turn-over ngadto sa BID-7 alang sa temporaryong pagkabilanggo.

Matud pa ni BID-7 Regional Director Geronimo Rosas atol sa ilang pagsusi sa mga dokumento ni Xu kini legal nga misulod sa nasud diin niadtong milabay’ng Sabado, Hulyo 29 kini miabot ug kini maoy ikaduhang higayon nga mianhi sa Sugbo.

Matud pa ni Rosas nga ilang huwaton ang resulta sa imbestigasyon sa kapolisan sa kasong gipasaka ni Camasura ngadto sa piskaliya sa dakbayan sa Sugbo ug human sa maong kaso kini ipaubos si Xu sa blacklist ug posibleng ideklarar nga undesirable alien.

Si Xu kasamtangang gibilango sa buhatan sa BID samtang ang duha ka kauban niini nga si Xu Ri Luang ug Xu Hua Xing nga lakip sa gipasakaan og kaso ni Camasura kasamtangang gawasnon.

Matud pa ni Camasura ang duha posibleng mamiktima na usab pinaagi sa ilang modus operandi nga pagbaylo sa orihinal nga cellphone ngadto sa peke nga cellphone human ang usa ka biktima madani sa kaanindot sa modelo niini.