CCMC miinsister batok sa planong Tomas

Giinsister sa hepe sa Cebu City Medical Center (CCMC) Dra. Myrna Go nga dili dayon angayan modiretso lang og hukom si Mayor Tomas Osmeña sa pagtugyan sa pagdumala sa maong publikong tambalanan ngadto sa probinsya sa Sugbo.

Hinuon gihagit ni Go si Osmeña nga mopahigayon og subsob nga ebalwasyon kabahin sa performance karon sa CCMC ubos ning kapin sa tuig niyang pagdumala sa maong tambalanan.

Giinsister gihapon sa mayor ang mao niyang plano nga pagtugyan na lang sa CCMC ngadto sa probinsya sa Sugbo sa higayon nga dawaton ni Gobernador Gwendolyn Garcia ang mao niyang tanyag.

Gibutyag ni Osmeña nga bugtong makausab sa iyang mga nakab-ot nga desisyon kun mahibalik nga buhi ang iyang kanhi drayber nga namatay sa usa ka vehicular accident tungod sa dili maayong sistema sa CCMC.

Samtang si Gobernador Gwendolyn Garcia nagkanayon kagahapon nga ang tanyag ni Osmeña angayan nga pakigsabotan una kini sa konseho sa dakbayan.

"In the case of Cebu City, I think Mayor Tommy himself said it, iya pa lang na, still has also talk with the council, mas maayo siguro sila usa ang mag-istorya" ni Garcia pa.

Mokabat sa P140 milyones nga salapi ang gigahin sa kagamhanan sa Sugbo matag tuig sa CCMC.