Kolektor gitulis, nakuhaag P70mil

Kolektor sa Dunkin Donut gitulis sa duha ka tawong magbonet didto sa dalan H. Cortes, Subangdaku, Mandaue sa milabay'ng gabii.

Ang biktima mao si Roy Polmones, 23, ulitawo ug nagpuyo sa Taytayan Hills, Bogo ug nagtrabaho isip kolector sa Dunkin Donut.

Base sa pamahayag ni Polmones sa kapolisan sa Station 2 sa Mandaue nga samtang gikan siya (biktima) nangolekta sa halin sa ilang mga branches ug pagpadulong na niya sa main office dala ang P70 mil luwan sa iyang motorsiklo duha ka tawo nga nagbonet luwan sa laing motorsiklo ang migukod kaniya.

Atol sa ilang ginukdanay natumba si Polmones ug gitionan sa wala mahibaw-ing kalibre sa armas dayong kuha sa motorsiklo ug misibat sa maong dapit.

Atol sa iyang pagtaho sa kapolisan sa Station 2, si PO3 Dindo Montesclaros nakadawat og taho nga dunay giabandonar nga motorsiklo sa Dunkin Donut sa Mandaue Reclamation Area hinungdan sa ilang pagresponde.

Nag-andar pa ang motor apan wala na ang yawe niini ug gilungkab ang delivery box diin didto gibutang ni Polmones ang kwarta nga balor P70 mil.

Hangtod karon padayon pa ang pag-follow-up sa kapolisan sa station alang sa pag-ila sa posibleng responsable sa maong pagpanulis.