Polis sa rmg misukol sa SWAT

Polis nga sakop sa Regional Mobile Group gisikop sa mga sakop sa Special Weapon and Tactic sa Lapu-Lapu human kini misukol ug misibat sa imbestigasyon gumikan sa kahubog didto sa unang taytayan sa dakbayan sa Lapu-Lapu.

Ang gisikop mao si PO1 Joan Regis Almagro San Diego, 31, ulitawo nga nagpuyo sa dalan P. del Rosario, dakbayan sa Sugbu ug sakop sa RMG nga nadistino sa Sibonga.

Matud pa ni PO3 Jacinto Mandal Jr., team leader sa SWAT sa dakbayan sa Lapu-Lapu nga samtang nagpahigayon sila og checkpoint sa ubos sa unang taytayan habig sa dakbayan sa Lapu-Lapu, ilang gipahunong si PO1 San Diego nga nagmaneho og motorsiklo.





Sumala pa ni PO3 Mandal nga nakalapas sa lagda sa trapiko si PO1 San Diego, apan sa pagsita nila student permit lamang ang lisensiya sa pagmaneho niini.

Naalarma ang kapolisan tungod kay naka-sibilyan lamang kini samtang nagtakin sa iyang .9mm nga pistola.

Si PO1 San Diego mipakita sa iyang ID isip sakop sa PNP nga gipirmahan ni PNP 7 Regional Director Chief Supt. Silverio Alarcio Jr. ug ang lisensiya sa armas nga dala niini.

Gumikan kay nakasibilyan ug hubog kini gidala sa mga sakop sa SWAT sa Lapu-Lapu Police Station alang sa dugang pakisusi sa iyang pagka-polis ug sa tuyo nga patubagon kini sa kalapasan sa lagda sa trapiko.

Apan pag-abot sa buhatan sa Investigation Section kalit kining midagan ug mihagit sa kapolisan nga nagkanayon: "Basta mouli ko sa amo, pusila ko ninyo" hinungdan nga nahitabo ang ginukdanay hangtod sa pagkasikop niini pagbalik human sa nilayogay.

Gumikan sa maong hitabo si PO1 San Diego pasakaan og kalapasan sa Art. 151 sa Revised Penal Code kun 'disobedience in person in authority' ug "paghuboghubog" ngadto sa piskaliya sa Lapu-Lapu.