Talisay nagpatabang

Konseho sa Talisay nangayo og salapi gikan sa kagamhanan sa probinsiya para gamiton sa pagpa-ayo sa mga guba nga mga classroom sa pampublikong tunghaan sa dakbayan.

Si Konsehal Richel Bacaltos, tsirman sa komitiba sa edukasyon mibutyag nga adunay mga classroom nga angayan na gyud nga ayohon tungod kay nakahatag kini og mga kahasol sa mga estudyante.

Sa milabay'ng adlaw si Bacaltos mipasar og resolusyon nga naghangyo ni Bokal Juan Bolo nga mogahin og P150, 000 para sa nahisgutang proyekto.

Matud ni Bacaltos nga ang dakbayan sa Talisay migahin na og pundo sa Local School Board ug ang maong salapi nagahin na kini sa suholan sa mga Teacher Aide Volunteers ug wala nay nahibilin para sa pagpaayo sa mga guba nga classroom.

Ang konsehal midungag nga ang tumong sa dakbayan mao ang paghatag og kahapsay sa mga tinun-an sa ilang pagtuon panahon nga mosulod sila sa klase.