BIN na gyud ibutang sa CH

Sugod karung adlawa taktakon na sa kagamhanan sa dakbayan sa Sugbo ang serbisyo sa kapin sa 100 ka mga gwardiya sa Assault Security Agency nga nadistino sa Cebu City Hall.

Kini tungod kay pormal nang ipatuman ang nakab-ot nga bag-ong sistema nga gisagop ni Mayor Tomas Osmeña aron mapalig-on pa ang siguridad sa balay lungsod.

Ang mga sakop sa Barangay Intelligence Network (BIN) mao nay pormal nga mo-take over sa mga pwesto nga biya-an sa mga security guard sugod karung buntag human wala na-irenew sa siyudad ang kontrata niini tali sa Assault security Agency nga pormal nang napopos kagahapong adlawa.

Apan gi-klaru sa mayor nga mga volunteer lang ang mga sakop sa BIN nga madistino sa City Hall ug magdawatan kini og mokapin sa usa ka libo ka pesos nga allowance matag bulan gikan sa City Hall.

Hinoon gipadayag sa mayor nga andam siya og tagana nga mohatag og usbaw sa allowance niini nga adto kuha-on sa iyang Intelligence fund aron deretso kining mahatag tungod kay dili naman moagi pa sa konseho.

Ang numeru-unong hinungdan nga gihulipan sa mayor ang mga security guard tungod kay mas maayo og performance ang mga sakop sa BIN ug labaw sa tanan wala na usab mo-function pa ang Civil Security Unit kon CSU sa City Hall.

Sagad hinoon sa mga sakop sa BIN nga nadistino sa City Hall mao kini ang gidistino kaniadto diha sa South Reclamation Project (SRP).

Gidugang sa mayor nga sa higayon nga buksan na ang mga establisamento sama sa mga hotel ug restaurant diha sa SRP iyang gipasalig nga iyahang irekomendar nga pasudlon og trabaho bisan og magsilbing waiter ang mga sakop sa BIN. - Darrel A. Carumba