Inahan, anak giluba

Inahan gidunggab gamit ang plamingko sa kapuyo nga lalaki apil ang iyang anak nga lalaki niadtong miaging gabii sa Tagjagimit, Naga.

Patay dihadiha silang Magdalena Taborada, hingkod, buwag sa unang bana, ug ang iyang anak nga si Gerry, 12, taga Linao, Minglanilla ug kasamtangang nanimuyo sa naasoy'ng lugar.

Midunggab sa inahan ug anak nailang si Sulficio Heraldez, 38, biyudo, ug kapuyo ni Magdalena.

Sa pakisusi ni SPO4 George Canamon ug mga kauban sa Naga Police Station, nasayran nga nauli si Heraldez nga hubog ug mitumaw ang panaglalis tali niya ug ni Gerry.

Gamit ang 18-pulgadas nga plamingko, gihansakan ni Heraldez si Gerry unya gisunod si Magdalena.

Si Gerry nakaangkon og samad sa bukton nga milapos sa kilid sa lawas, samtang si Magdalena nasamdan sa iyang dughan.

Si Heraldez daling misibat human sa hitabo. Apan bisan pa niini, pasakaan kini og kasong double murder. - Rey B. Pasaporte