Krimen sa mga batan-on "mosaka"

Napanglantawan nga sa umaabot nga mga adlaw mosiaw ang mga krimen - ilabi na ang pagpangawat - nga pasiugdahan sa mga batan-on nga nagpangedaron og 15-anyos ug ubos pa sa maong panuigon.

Gihikay na karon ang mga papeles alang sa pagpalingkawas sa ubay-ubay'ng minor detainees diha sa Operation Second Chance sa barangay Kalunasan, samtang sa ubang bahin sa nasud, hinay-hinay na nga gipagawas sa prisohan ang maong mga batan-ong binilanggo.

Ang kadagkoan sa Operation Second Chance mitataw nga bisan og napirmahan na ni Presidente Arroyo isip hingpit nga balaod ang Republic Act 9344, kon Juvenile Justice and Welfare Act of 2006, apan ang hukmanan maoy mohimo'g kamandoan sa pagpagawas sa mga priso.

Ang mga gwardya sa Operation Second Chance miingon nga kon mabuhian na ang maong mga batan-ong priso, dili imposible nga sila mohimo na usab og laing salaod ug lisod na sila nga mahimoan og lakang.

Ang balaod nga gipangamahanan ni Senador Francis Pangilinan naglatid nga ang mga 15 anyos ug ubos pa nga pangedaron, dili na mahimong prisohon kay giwagtang na ang criminal liability kanila.

Ang lagda mao nga kon dunay mga madakpan nga 15-anyos o kaha ubos pa sa maong pangedaron, kinahanglang itugyan ra kini sa mga opisyal sa Department of Social Welfare and Development.

Pagka karon kapin sa katunga sa 84 ka priso diha sa Operation Second Chance, ang bilanggoan sa dakbayan alang sa mga minor de-edad, nagpanuigon og ubos sa 15-anyos.

Dunay uban nga nanglantaw nga lisud na kaayo kon ang mga batan-on ang makahimo og krimen karong panahona kay dili na man sila mahimong ipabilanggo.