Magtiayon gipamusil sa mga nagmaskara

Mga nagmaskarang lalaki ang kalit lang misaka sa panimalay sa magtiayon ug gipamusil hinungdan sa pagkaangol sa asawa samtang ang bana nakaambak sa bintana sa Daan Lungsod sa lungsod sa Medellin ala 1 pasado ang takna sa miaging gabii.

Ang naangol mao si Myrna Venturan, 32 anyos, minyo ug nagpuyo sa maong dapit kinsa nakabaton og samad pinusilan sa iyang paa nga maoy hinungdan nga dali kining gidala sa tambalanan.

Si SPO1 Alfredo Limalima sa kapolisan sa nahisgotang lungsod miingon nga ang bana sa biktima nga si Renato Venturan, hingkod ang panuigon nga nakaambak sa bintana ang dali usab nga nakapangayo og tabang sa silingan.

Hinungdan nga ang upat ka nagmaskarang lalaki nagdali sa pagpanganaog sa ilang panimalay ug nangikyas.

Dugang pa ni SPO1 Limalima nga ilang gituohan nga atraso ni Renato ang hinungdan sa maong pagpamusil sa wala hiilhing mga lalaki apan nakalingkawas lamang kini ug ang asawa maoy naigo.