Ang gisikop mao si Jason Apa Sagarino, hingkod ang panuigon, usa ka mahuyang nga nagpuyo sa Sitio Datag, Maribago, Lapu-Lapu.
Ang pagkasikop ni Sagarino pinaagi sa warrant of arrest nga giluwatan ni Lapu-Lapu City RTC branch 54 Judge Victor Teves niadtong Hulyo 26 ning tuiga.
Human masayri nga si Sagarino anaa kini sa iyang panimalay ang kapolisan sa dakbayan sa Lapu-Lapu pinaagi kang SPO1 Honorato Tano sa Intelligence and Operations Section mihimo dayon sa pag-serve sa maong warrant of arrest ngadto kang Sagarino.
Base sa imbestigasyon niadtong Mayo, si Sagarino isip usa ka mahuyang ug nagpuyo sa panimalay sa biktima maoy gisangonan pagpabantay sa 4-anyos nga batang babaye samtang nanarbaho ang mga ginikanan niini.
Dako na lang ang kahibulong sa inahan sa dihang miuli nga nagsige og hilak ang bata ug maglisod na kini og pagawas sa iyang ihi.
Sa dihang namatikdan sa inahan nga dunay deperensiya sa kinatawo sa bata dali kini niyang gipahiling sa pink room sa Vicente Sotto Memorial Medical Center.
Matud pa sa biktima nga gisulod ni Sagarino ang kinatawo niini ngadto sa iyang kinatawo.
Nanghulga pa si Sagarino nga patyon ang inahan niini kun motug-an sa maong insidente.
Kasamtangang gibutang ang bata sa kustodiya sa iyang iyaan.
Human nga positibo ang resulta sa pagpahiling sa bata dali nga mitaho sa Women's Desk sa Lapu-Lapu ang inahan hinungdan nga napasaka ang kasong pagpanglugos ngadto sa korte ug pagluwat og warrant of arrest batok ni Sagarino.
Gumikan kay wala masayod si Sagarino sa pagpasaka og kaso ug paglusot sa warrant of arrest kini nasikop didto mismo sa panimalay sa biktima ug kasamtangan kining gibilanggo sa kapolisan sa Lapu-Lapu.
Hugot nga gihimakak ni Sagarino ang maong alegasyon. Si Sagarino nag-atubang og kasong pagpanglugos ubos sa Art. 266 paragraph 1 (d) sa Revised Penal Code nga giamendar sa Akta Republika 8353.