Way umento sa buhis

Gipasalig ni City Administrator Francisco Fernandez nga walay mahitabung pag-umento sa mga bayranang buhis dinhi sa dakbayan sa Sugbo bisan pa man sa dakong utang sa siyudad nga miabot og sobra sa P5 bilyones gumikan sa loan niini nga gigamit pagpatukod sa South Reclamation Area.

Matud ni Fernandez atol sa press conference niini kagahapong adlawa bugtong himuon nila mao ang pagpalig-on sa koleksyon sa buhis ilabi na niadtong mga establisamento nga wala magbayad sa ilang tinuig nga obligasyon.

Gipahibalo ni Fernandez nga sukad niadtong Hunyo 30 nakakolekta na og P1.2 bilyones ang City Treasurers Office sa dakbayan nga mas taas kun itandi sa milabay'ng tuig sa susamang kwarter.

Samtang ang gastuhan sa siyudad miabot lang og P700 milyones og dunay sobra nga P500 milyones.

Hinuon gipahibalo ni Fernandez nga dunay himoong valuation sa mga real state properties aron madungagan ang panudlanan sa dakbayan.

Matud ni Fernandez nga wala maglisud karon og pundo ang dakbayan sukwahi sa mga nanggawas nga report nga bangkarota ang siyudad nunot sa plano niini nga pagbaligya sa propriedad niini sa may North Reclamation Area ngadto sa magpapatigayong Gokongwei.

Gani karong petsa 18 sa Agosto gitug-an ni Fernandez nga mao na usab ang ikaduhang higayon ning tuiga sa pagbayad sa siyudad sa datahan niini sa loan sa Japan Bankers for International Cooperation (JBIC) nga mokantidad og P200 milyones.

Matud ni Fernandez iya nang gipahibalo ang Landbank of the Philippines nga mobayad ang siyudad sa maong kantidad sa dili pa moabot ang maong petsa.