Pakisusi reklamo's traysikad ipaduso

Gimanduan ang hepe sa Cebu City Traffic Division, Chief Insp. Marlou Martinez nga moduso og report kabahin sa resulta sa imbestigasyon niining gihimo batok sa mga sakop nga gireklamong nangilkil ngadto sa mga madakpan niining trisikad drayber.

Matud ni konsehal Sylvan Jakosalem, tsirman sa committee on transportation nga gikasabutan sa milabay'ng tigum nga moduso og report sa resulta sa maong imbestigasyon si Martinez atol sa sunod tigum sa Citom Board karung sunod semana.

Gibutyag sa konsehal nga gusto nilang makahatag og katin-awan si Martinez kabahin sa maong reklamo ilabi na gyud sa pasangil nga mangilkil og tag P500 ang grupo nila ni SPO4 Jesus Tamayo ug tulo ka Citom enforcer dihang nanakop kini og mga traysikad drayber diha sa may dalan Tomas Abella niadtong milabay'ng mga semana.

Giangkon sa konsehal nga nakahatag na sa iyang pagpasabot si Martinez kabahin sa pasangil sa iyang mga sakop nga giingong pagpihigpihig og panakop sa mga traysikad nga dunay plate number GBY gumikan kay makita man sa ilang compound diha sa Citom nga dunay pipila ka mga nadakpang traysikad nga dunay plaka nga GBY ang wala pa gani malukat.

Si Martinez una nang mipadayag nga iyang gihikling ang imbestigasyon sa maong pasangil gumikan kay hangtod karun wala gyud mopatim-aw sa iyang buhatan ang mga hingtungdan.