'Kawatan kuno' gikulata, gigaid

Usa ka lalaki nga gipasanginlang kawatan ang gitabangan og kulata ug gigaid sa mga residente diha sa usa ka punoan sa tsikos sa Banilad ning dakbayan kagahapon sa kaadlawon.

Ang biktima kinsa naluwas sa mga polis nga miresponde giilang si Gani Mendez, 43, nga taga Back Makro, Subangdaku dakbayan sa Mandaue.

Sumala pa sa imbestigador nga si SPO1 Elvis Anunciado sa Mabolo police sa pakighinabi sa Banat News nga naluwas si Mendez nila ni PO1 Julieto Elarcoza ug PO1 Bernard Erojo gikan sa pagkagaid kaniya sa maong punoan.

Gikatahong gidudahang kawatan si Mendez sa mga tawong namuyo sa maong lugar maong gitabangan kini og kulata dayon gigaid diha sa maong punoan kagahapon sa kaadlawon.

Sumala pa sa radio reports nga natangtangan gyud og tulo ka ngipon ang biktima gumikan sa pagpangulata kaniya. Gikatahong dunay tulo ka tawong maoy miunag kulata kaniya dayong dunay lain pang nangabot ug mikulata usab sa biktima.

Matud pa sa di kumpirmadong report nga dunay misinggit nga tagbalay nga nagpakitabang nga dunay kawatan hinungdan nidugok ang mga estambay ug gikulata si Mendez.

Wala usab matino sa kapolisan kung si kinsa ang midagmal sa biktima sanglit bisan usa walay nailhan si Mendez

Nianang hayag-hayag na nataho ngadto sa Mabolo police ang nahitabo kang Mendez maong gipadad-an kini og mga polis.

Ang biktima daling gidala ngadto sa Cebu City Medical Center samtang walay natahong gikawatan diha sa maong dapit atol sa pagsulat ning balita base usab sa blotter sa kapolisan.