Listeners mireklamo vs reporter

Gipadangat sa liboan ka mga tigpaminaw sa estasyonan sa DyHP nga lumolupyo sa dakbayan sa Mandaue ang ilang reklamo ug petisyon batok sa usa ka komentarista niini kinsa migamit sa law-ay ug malisyoso nga mga pulong sa kahanginan.

Ang mao nilang reklamo ilang gipadangat ngadto kang Atty. Ruben Canoy nga maoy tag-iya sa Radio Mindanao Network , DYHP, Atty. Cynthia Barte, station manager sa maong sibyaanan ug Edward Abad, presidente sa Kapisanan ng mga Brodkaster ng Pilipinas (KBP) dinhi sa Sugbo.

Ang gireklamo sa mga tigpaminaw sa DyHP mao si Joash Dignos nga komentarista nga mabati sa maong sibyaanan alas 6 sa buntag hangtod sa alas 8 sa buntag nga nagtumbok kang Mayor Thadeo Ouano sa dakbayan sa Mandaue nga mibalikbalik sa pagpadayag nga "mi-jer-jer" sa umagad nga si Cheryl Ouano.

Gikan sa nagkadaiyang barangay sa maong dakbayan nga mga tigpaminaw sa DyHP ang mipamatuod sa ilang reklamo ug protesta batok kang Dignos pinaagi sa pagtala sa ilang mga pirma ug ginotaryohan usab kini ni Atty. Eleizer Cabrera.

Subay sa pamahayag sa gipirmahan nilang reklamo sa mga tigpaminaw sa DyHP maoy ilang gipadayag ang hilabihan gayod kalaw-ay sa mga pulong nga gigamit ni Dignos sa iyang pagpangumentaryo batok kang Ouano.

Matud pa nila nga nagkinahanglan kini sa pagtagad sa kadagkoan sa maong sibyaanan ug KBP sanglit wala na man kini mosubay sa hustong lagda sa panibya.

Gipasabot nila nga gidayeg nila ang komentarista nga mosaway sa mga opisyal sa gobyerno apan ngil-ad nga paminawon kun kini hugawhugawan pinaagi sa paggamit og mga pulong nga malisyoso nga makadaut sa pangisipan sa mga bata.