Mao kini ang gibutyag ni Senador Aquilino Pimentel kinsa miingon nga gipaabot sa mga mananagat ug mag-uuma sa Mindanao nga hatagan og dakong gibug-aton sa Pamuno Nasud ang ilang pagka-abunda sa pagkaon sa kaumahan ug kadagatan.
Matud pa ni Pimentel nga malipay gyud unta kaayo ang mga katawhan sa Mindanao kun gipalanog pa sa Presidente ang iyang dakong pagsalig nga ang Mindanao piyalan sa panginahanglang pagkaon sa nasud atol sa iyang Sona.
Lahi sa Cebu ug Bohol nga gipatil-is gyud pag-ayo sa Presidente ang iyang pahibawo nga magsilbing sentro sa turismo sa nasud ug sa Central Philippines Region ang maong mga lugar.
Sa maong pamahayag nakapalipay kaayo sa mga molupyo sa Kabisay-an tungod kay kini nagpasabot nga daku kaayo og panglantaw ang Pamuno nasud sa maong mga lalawigan.
Hinoon sa ubang mga pamahayag sa Pamuno nasud sa iyang Sona, si Pimentel nagkanayon nga napakyas usab ang Pamuno nasud sa pagladlad sa uban pa niyang mga plano alang sa nasud sa umaabot pang mga katuigan.
May mga pamahayag ang Pamuno nasud nga naghatag usab og kasayoran sa katawhan ilabina sa mga dagkong proyekto didto sa Luzon nga maoy gihatagan og daku kaayong higayon pagpaila pinaagi sa iyang Sona, matud ni Pimentel.