3 ka libel gipasaka sa mga Ouano batok reporter

Tulo ka kasong libel ang gipasaka sa banay ni Mandaue City Mayor Thadeo Ouano batok sa anchorman sa DYHP nga si Joash Dignos kagahapon.

Kini gumikan sa giingong "below the belt" na kaayo nga komentaryo ni Dignos ug nipakauwaw sa umagad nga si Cheryl Ouano nga giunay pagpakighilawas sa mayor.

Si Cheryl kinsa maoy executive secretary sa mayor mao mismo ang nakadungog sa pag-ingon ni Dignos nga "Opisyal sa usa sa mga dakbayan sa Metro Cebu ni-ger-ger sa iyang umagad" dayun katawa nga bugal-bugal.

Nagtoo ang banay'ng Ouano nga gipasabot nga opisyal mao ang mayor samtang ang umagad mao si Cheryl, ang asawa ni Bokal Alfred Francis Ouano.

Si Dignos kinsa nagdumala sa tulumanon nga Birada matag alas 6 hangtud alas 8 sa buntag sa DYHP namukaw usa ka higayun kang Ouano nga nagkanayun nga, "opisyal nga ni-jer-jer sa umagad, mata na!"

Niadtong Hulyo 17, nadunggan usab si Dignos nga niingon, "Thadeo, di jud ka mumata diha, Thadeo? Unsa man nagtinambaloslos ka diha Thadeo Ouano? Ikaw kaning gikaingon nga chief executive officer nga ni jer-jer og umagad."

Walay danyos nga gipangayo ang banay'ng Ouano sa ilang pagpasaka sa kaso.

Gipasabot sa ilang abogado nga si Atty. Gloria Lastimosa-Dalawampu, nga unya na sila mangayo sa danyos sanglit unahon nila ang kriminal nga aspeto nga mataral gyud si Dignos sa hukmanan.

Si Linda Ouano, asawa sa mayor, nipadayag nga grabe kaayo ka bastos si Dignos ug dili mabayran og pila nga salapi ang kadaut nga iyang nahimo ngadto sa ilang pamilya.