500 ka polis sa PRO-7 mataktak

Dunay kapin sa 500 ka mga polis nga sakop sa Police Regional Office 7 ang nameligrong mataktak sa ilang serbisyo gumikan sa ilang katambok ug ang uban huyang na ang lawas alang sa maong trabaho.

Kini gumikan sa pagkahagbong sa maong mga polis sa labing ulahing semestral physical fitness test (PFT) nga gihimo niadtong milabay'ng bulan sa Abril sumala pa ni Chief Supt. Silverio Alarcio, ang direktor sa PRO7.

Si Alarcio sa pakighinabi sa Banat News mibutyag nga kining maong mga polis wala kapasar sa maong test, samtang ang uban wala gyud motambong sa ilang PFT gumikan sa daghang mga rason.

Dunay mga mirason nga nasakit, dunay uban nga dunay gihimong trabahuonon ug ang uban duna gyuy gipakitang mga medical certificate nga ang ilang mga doktor nagdili kanila sa pagbuhat og mga bug-at nga gimbuhaton gumikan sa ilang balatian.

Si Alarcio nagkanayon nga di kini igong rason kung ang pagkapolis maoy hisgutan. Matud pang Alarcio nga sukad sa pagsulod sa usa ka aplikante sa pagkapolis hangtud sa pagretiro niini mao gihapong 'kwalipikasyon' ang gipangita sa PNP.

"Ever since they have started in their job it is a continuing qualification until they retire," asoy pang Alarcio.

Matud pang Alarcio kadtong mga natagak sa PFT hatagan og tulo ka mga higayon kun usa ka tuig ug tunga aron makapasar sa maong test ug kung dili angayan na silang taktakon sa serbisyo.

"They will be given three tries or chance to shape up, or they will be attrited," pasabot pang Alarcio.

Sumala pang Alarcio nga ang pagtaktak kanila ipaagi sa medical process, diin ang taga medical personnel na maoy mohimo og rekomendasyon nga human sila mahatagi og higayon wala gihapon sila mopasar.

Alang kang Alarcio, kun ang usa ka polis di na makapasar sa standard sa PNP sa physical fitness kinahanglang tangtangon na kini sa serbisyo pinaagi sa physical disability discharge.

Matud pa sa maong opisyal nga kaniadto pa kining maong palisiya sa kapolisan nga gipaluyuhan sa National Police Commission.

Ang PFT naglangkob sa pagdagan og usa ngadto sa tulo ka kilometro, push-ups, set-up, pull-ups ug 100-meter dash. Apan ang gidaghanon ug gilay-on sa daganon mag-agad sa edad sa polis.

Samtang ang waistline kon hawak, mag-agad sa edad, height ug timbang sa polis aron matino nga "proportion" gyud ang panglawas sa maong polis.

Ang kapin sa 500 ka mga polis naggikan sa Cebu, Cebu City, Bohol, Negros, Siquijor ug uban pang dapit nga sakop sa PRO-7, asoy pang Alarcio.