Mga alas 6:00 pa sa buntag kagahapon nga gi-deploy ang mga BIN tulo niini sa City Savings Bank building diin kasamtangang nag-opisina ang mga konsehal ug ang laing upat atua madestino sa Annex Building sa City Hall.
Gibutyag ni Sidney Racasa nga niadto pang miaging adlaw gipahibalo sila nga anha na idistino sa City Hall gumikan kay i-pull out na ang mga blue guards sa tapos karung bulana.
Gibahin ngadto sa duha ka shifting ang mga BIN nga gidestino sa City Hall diin ang unang batch niini mo-duty sa alas 6:00 sa buntag hangtud sa alas 6:00 sa hapon ug samtang ang ikaduhang batch mo-duty sa alas 6:00 sa hapon hangtod sa alas 6:00 sa buntag.
Apan gibutyag sa guard ug duty nga si Felix Besario sakop sa Assault Security Agency ug nadestino sa City Savings Bank Building nga sukad kagahapon wala sila makadawat og pormal nga kamanduan nga i-pull out sila sa ilang area.
Matud ni Besario mopadayon gihapon siya ug ang iyang mga kaubanan sa pag-duty hangtud nga makadawat og pormal nga order aron paglikay nga dili sila ma-awol sa trabaho.
Kasaligang tinubdan sa City Hall mitug-an sa Banat News nga desisyon ni Mayor Tomas Osmeña ang pagdestino sa mga sakop sa BIN sa City Hall isip hulip sa mga blue guards
Si Konsehal Augustus "Jun" Pe nga nahinabi sa Banat News mipadayag nga si City Administrator Francisco Fernandez maoy dunay igong kasayuran kabahin sa paghulip sa mga gwardiya ug mga sakop sa BIN.