Konsehal naligsa'g dumptruck

Konsehal sa Basak, Lapu-Lapu patay gyud human kini maligsi og dumptruck sa Gabi, Cordova sa milabay'ng hapon.

Ang biktima mao si Mauricio Limpangog, 45, lumad sa Sitio Sudtungan, Basak, Lapu-Lapu ug unang konsehal sa maong barangay.

Ang nakaligis mao ang dumptruck nga gimaneho ni Oscar Tukal, 36, lumad sa Hagnaya, Carmen lalawigan sa Sugbo.

Matud pa ni SPO1 Larry Wagwag sa Cordova Police Station nga samtang luwan sa iyang motorsiklo si Limpangog pauli na sa ilang panimalay usa ka sakyanan ang iyang nadumbolan ug sa dihang natumba si Limpangog ang iyang tiil misiwil kini sa pikas linya sa dalan.

Sumala pa sa drayber nga si Tukal nga kalit ang maong panghitabo gumikan kay sa pikas dereksiyon sa dalan ang iyang pagmaneho sa dumptruck ug wala na kini makabantay nga iya nang naligsan ang tiil ni Limpangog.

Gidali pagdala sa Mactan Doctor's Hospital si Limpangog apan gumikan sa nahiagumang bali sa tiil mugna sa bug-at usab nga kargamento sa dumptruck ang biktima gideklarar nga dead on arrival.

Si Tukal natanggong karon sa Cordova Police Station samtang gihikay pa ang kasong ipasaka batok kaniya.