Plaza Fair nasunog; P20 M danyos

Sunog nga milamoy sa tulo ka andana sa Plaza Fair diha sa dalan Colon kagahapon sa kaadlawon mitala og P20 milyones nga danyos samtang ang mga sikbit nga edipisyo wala maunsa.

Si SFO1 Bernie Baruel,usa sa mga imbestigador sa Cebu City Bureau of Fire Protection mibutyag base sa imbestigasyon ni SFO2 Alicasim Espinola nga nagsugod ang sunog diha sa ikaupat nga andana sa maong edipisyo pasado alas 12:30 sa kaadlawon.

Duha ka mga stay-in nga mga trabahante nga sila si Odelon Nesto ug Roldan Bestar kinsa nangatulog diha sa third floor gikatahong nakadungog sa mga nabuak nga mga samin gikan sa ibabaw.

Dali nilang gisusi ang ikaupat nga andana apan nakugang nalang sila sa dakong sunog nga mao diay nakaingon sa pagkabuak sa mga bildo nga nangahagsa sa sawog.

Ang duha daling nanganaog aron luwason ang kaugalingon. Ang kabom- berohan nakadawat og tawag gikan sa usa ka nagpailang Comeros kabahin sa nagsigang fourth floor sa maong department store.

Gumikan sa kasikbit sa mga edipisyo giisa ang alarma ngadto sa general alarm hinungdan nga ang tanang mga fire fighting units sa Metro Cebu ug ang mga fire volunteers daling miresponde.

Matud pang Baruel nga aron di katapon ang sunog sa pikas nga mga edipisyo gipasiritan og tubig ang wala pa masunog samtang ang uban naninguhang makontrol ang kalayo diha sa maong department store.

Human sa 50 minutos nga kumbate una pa nakontrolar ang kalayo ug hingpit nga napawong alas 8 na sa buntag kagahapon.Walay natahong nasakitan sa insidente.

Ang mga imbestigador napakyas kagahapon sa pagsulod sa fire scene aron sa pagpahigayon sa ilang imbestigasyon gumikan sa kainit sa dapit.

Matud pang Baruel nga niadtong 2004, nag-rewiring ang maong department store sa mga electrical connections niini apan bugtong ang fourth floor ra ang wala maapil.

Gisusi na karon kung ang hinungdan sa sunog electrical short circuit ug ingon man sa posibilidad nga dunay liquefied petroleum gas sa mga kan-anan diha sa maong dapit ang nakaingon sa maong sunog.

Ang ground floor bisan wala maabti sa kalayo nadanyos gihapon gumikan sa tubig nga miawas gikan sa ibabaw, lakip usab sa nangabasa ang mga kahimanan mao ang Mc Donalds ug Orange Brutus nga mga nangabang og pwesto sa maong edipisyo.