Mandaue market mahal kay sa CICC gi-esplikar

Nganong mas mahal ang Mandaue City Modern Public Market itandi sa Cebu International Convention Center?

Gidetalye sa buhatan ni Mayor Thadeo Ouano ang tubag sa maong pangutana human gihimong isyu ang mas mahal nga presyo sa gitukod nga merkado publiko sa syudad itandi sa CICC nga gamiton alang sa Asean Summit karong Disyembre.

Una mao nga ang merkado publiko dunay gilapdon nga 2.4 ka ektarya sa iyang floor area samtang 1.4 ektarya lang ang CICC.

Mokabat sa P18,000 ang presyo matag metro kwadrado sa luna base sa industry standard sanglit ang dakbayan sa Mandaue usa man ka industrialized city.

Ang total project cost mokabat sa P471-milyones apil na ang P20-milyones nga planning and design cost; P15.4-milyones nga site development cost ug ang total project building cost moabot nalang og P435.7-milyones.

"This is not an ordinary market, it's a modern public market fit for a booming city like Mandaue," nagkanayun si Ouano.

Sa ground floor, dunay 1,412 ka wet and dry section stalls, airconditioned food court, ice maker ug cold storage, unom ka pansayan, tulo ka garbage rooms, bagsakan, loading ug unloading area ug market police station.

Sa mezzanine, anaa ang administration office ug uban pang lawak nga paabangan isip mga buhatan, dry section storage ug pansayan.

Waterproofed ang roof deck nga dunay 240 ka luna sa parking area, airconditioned restaurant nga may viewing deck, pansayan ug duha ka vehicular ramps, cistern tanked facility nga waterproofed, electrical ug mechanical facility, fire protection system.

Gawas niana, duna pay jeepney terminal, terminal office, waiting area sa mga pasahero ug PUJ parking area.