50 sa 80 ka barangay naigo's dengue

Kapin sa 50 gikan sa kinatibuk-ang 80 ka mga barangay dinhi sa dakbayan sa Sugbo ang apektado karon sa sakit nga dengue.

Subay sa gihimong monitoring sa City Epidemiology Surveillance and Statistics Unit (CESSU) gikan niadtong Enero hangtud sa Hulyo 9, mokabat na sa 295 ka mga kaso sa dengue ang natala sa dili mominos 52 ka mga barangay dinhi sa dakbayan.

Duna na usay tulo ang namatay sa dengue karong tuiga duha niini nagpangidaron og 4 ug 7 anyos gikan sa Oppra, Kalunasan ug Ermita ug ang ikatulo mao ang 75 anyos nga lolo nga molupyo sa Lahug.

Ang Kalunasan maoy nag-una sa kinadaghanan nga nataptan og dengue ning tuiga nga mitala og 21 ka mga kaso, gisundan kini sa Guadalupe nga mitala og 20 ka kaso.

Ang barangay nga ikatulo sa labing daghang kaso sa dengue mao ang Lahug ug Inayawan nga pulos dunay tag 16 ka kaso ug ang ika-upat mao ang barangay Bacayan dunay 14 ka kaso ug 11 ka kaso sa Apas.

Samtang ang Labangon, Cogon Pardo ug Banilad pulos dunay tag napulo ka kaso sa dengue.

Ang City Health Department pormal na usab nga mi-deklarar sa Sityo Oppra sa Kalunasan nga dengue outbreak situation gumikan sa daghang mga kaso sa dengue nga nahitabo niining lugara ug duna nay namatay.

Ang mga tinugyanan sa CHD padayong mipahinumdum sa mga molupyo nga batasanon ang pagpanglimpyo sa palibot ug ipangyabo ang mga magpundo nga tubig nga maoy itlogan sa lamok nga posibling magdala sa dengue.

Girekomendar usab ang kanunay nga pagdaob ug pagpa-aso sa palibot sa panimalay sa matag alas 4:00 sa hapon.