7-anyos 'dasmaga'g patrol car gimaneho sa hepe

Naangol ang usa ka 7 anyos nga batang babaye human milabang sa pikas nga dalan ug nadasmagan og patrol car nga gimaneho sa hepe sa Samboan atol sa pagbisita ni Gobernador Gwendolyn Garcia niadtong Biyernes sa hapon.

Nahitabo ang insedente alas 2:20 diha sa may National Road atubangan sa Central School sa San Roque Ginatilan.

Si Insp. Marlon Gamabao, hepe sa Samboan, maoy nagmaneho sa patrol car nga may plaka SVF 794.

Ang bata giila sa kapolisan nga mao si Sheila Garces Dohig, tinun-an sa Palanas Elementary School nga taga Sitio Camboo, Palanas, Ginatilan.

Segun sa report nga nadangat sa Provincial Police Office, nasayran si Insp. Gumabao maoy nagmaneho sa patrol car nag-una nila ni Gobernador Gwendolyn Garcia paingon ngadto sa Samboan.

Matud pa ang biktima kuyog sa iyang inahan diha sa maong lugar naglakaw daplin sa dalan, kalit lang Mibuwag ug nilabang sa pikas dalan. Apan wala kini makabantay nga adunay sakyanan sa polis nga nagpaingon nga patrol car hinungdan nga naigo kini og nalamba sa sementadong dalan.

Gidali pagkarga ni Insp. Gumabao sulod sa patrol car ug gihatod sa tambalanan sa MJ Cuenco Memorial Hospital gumikan sa mga pangos ug bun-og nga naangkon sa biktima.