2 ka pusher 'sikop sa 2 ka ronda

Duha ka gidudahang mga drug pusher gidakop sa mga sakop sa Criminal Investigation and Intelligence Branch atol sa managlahing ronda kagahapon sa kaadlawon diha sa barangay Punta Prinsesa ug Lorega-San Miguel ning dakbayan.

Ang nangadakpan giilang sila si Pacita Paul, hingkod ang panuigon taga San Roque, Lorega-San Miguel ug Louie Valdehueza, hingkod ang panuigon nga taga Guadalupe Village, Punta Prinsesa ning dakbayan.

Ang duha gidakop pinasikad sa search warrant nga giluwatan ni RTC branch 15 Jugde Fortunato de Gracia gumikan sa kalapasan sa R.A. 9165.

Ang CIIB pinanguluhan ni Supt. Pablo Labra II nakakuha og 15 ka mga medium size ug usa ka gamay'ng paketeng pulos dunay sulod nga gidudahang shabu uban sa mga drug paraphernalia diha sa panimalay ni Paul hinungdan sa iyang pagka-aresto.

Ang ronda gisaksihan sa mga opisyales sa barangay lakip na sa mga sakop sa media.

Samtang sa laing ronda, gidakop si Valdehueza human makakuha og lima ka medium size nga paketeng may sulod nga gidudahang shabu ug mga drug paraphernalia diha sa panimalay niini.

Ang kapolisan dugay ng naniid sa kalihukan sa duha human makadawat og impormasyon nga nagbaligya sila og shabu sa nahisgutang mga lugar.