Si Celestino Barliso, 55 residente sa lugar misukol sa kapolisan nga misikop kanila hinungdan nga gireklamo usab kini og direct assault.
Kauban ni Celestino nga nanghasi mao sila si Teodoro, 42 ug Matra Barliso ug usa ka giilang "Peddy" pulos usab mga residente sa maong barangay apan si Teodoro lang ang nalakip sa pagsikop sa mga polis tungod kay nakaikyas silang Barliso ug Peddy.
Si Leo Gaudiel hingkod, ang panuigon, kinsa daling mitaho sa kapolisan tungod sa kahadlok sa mga suspetsado.
Si PO2 Leandro Azarcon mibutyag kagahapon sa Banat News nga gihinay-hinayan na sa paglungag sa upat ang pader sa likod nga bahin sa balay ni Gaudiel.
Ang mga suspetsado nasuko ug nagpabuto sa armas si Celestino unom ka beses dihang gisita kini ni Gaudiel sa paglungag niini sa iyang pader.
Si SPO1 Ricardo Balbutin kinsa usa sa miresponde sa maong insidente gisuklan ni Celestino dihang ila na kining gisikop.
Si Celestino mihulbot sa iyang .45 kalibreng pusil apan dali kaayo kining nasignit sa mga polis.
Si Balbutin mireklamo og direct assault batok ni Celestino.
Si PO3 Benjamin Sebelleta mibutyag kagahapon sa Banat News nga si Celestino kanhi konsehal sa Lawaan 3 ug nahimo kining most wanted sa Talisay tungod sa pagpatay niini sa usa ka sakop sa cause-oriented group ug human sa maong hitabo nagtago-tago na si Celestino apan ang maong kaso naabswelto.
Matud pa ni Sebelleta nga si Celestino gikahadlokan sa lugar tungod sa pagkamaldito niini.
Nasakmit sa mga polis gikan ni Celestino ang usa ka .45 kalibre nga pusil, usa ka magazine niini nga dunay walo ka buhing bala, usa ka .38 kalibreng pusil ug unom ka buhing bala niini.
Si Celestino ug Teodoro naditener karon sa Talisay detention cell.