Tulo, nadakpan sa Carbon police

Tulo ka mga tawo ang nadakpan sa mga sakop sa Carbon Police Station atol sa gihimong ronda batok sa iligal nga drogas diha sa Ermita ning dakbayan kagahapon sa kaadlawon ug niadtong Biyernes sa hapon.

Ang nadakpan giilang sila si Roberto Yu,40, Patricia Baron Canedo,47, pulos mga residente sa Ermita Beach sa maong barangay ug Ares John Ortega Gimana, 26, taga Sta. Cruz lungsod sa Ronda.

Ang grupo ni Inspector Juanito Pajantoy, SPO1 Timoteo Lopezbaños, PO3 Joseph Victorioso, PO3 Inocencio Lumayag, PO2 Reynaldo Cabating ug PO2 Rey Dosdos armado sa search warrant nga giisyu ni RTC branch 13 Judge Mienrado Paredes.

Si Yu kinsa gidudahang tigpayuhot og drogas sa nahisgutang lugar gironda human makadawat og impormasyon ang kapolisan kabahin sa iligal nga negosyo niini.

Nakuha diha sa iyang balay ang 16 ka mga paketeng may sulod nga gidudahang shabu, mga drug paraphernalia lakip na ang mga gamit sa pag-repack niini.

Ang suspek kasamtangang gitanggong karon sa karsel sa maong buhatan.

Samtang niadtong Biyernes sa hapon nasikop sila si Canedo ug Gimana sa grupo ni Lopezbaños human sila gikatahong naaktuhang naghupot og mga drug paraphernalia diha sa Ermita Beach sa samang barangay. Ang duha gitanggong na usab sa samang bilanggoan.