Polis nasamdan

Usa ka polis nga sakop sa Regional Mobile Group 7 nga giuban sa mga sakop sa Optical Media Board (OMB) ang nasamdan atol pagpangronda sa mga pirated compact disc ug DVDs diha sa dalan Osmeña niadtong milabay'ng adlaw.

Ang nasamdan giilang si PO1 Harrifel Espinosa,27, sakop sa RMG-7 nga nadestino sa Sibonga kansang grupo gipakuyog sa mga ahente sa OMB nga sila si Dean Perez, Manuel Mangubat, Deogracias Ebuen atol sa pagpangronda.

Sumala pa sa imbestigasyon sa Homicide Section ang maong polis human mipailang polis diha sa usa ka vendor sa Cebu Market Center sa dalan Osmeña, Kalubihan ning dakbayan nga ila untang rondahon dihang ang wala mailhing vendor kalit nga mibalya sa pultahan nga ginama sa bildo.

Gumikan sa kakusog sa pagbalya, nabuak ang samin niini ug adto naigo kang Espinosa.

Si Espinosa nakaangkon og samad diha sa iyang apapangig duol sa liog, tuong bukton, tuong bahin sa iyang hawak ug daghang mga samad diha sa tuong bitiis.

Ang suspek wala madakpi sa raiding team sanglit dali kining nakadagan ug misagol sa bagang duot sa mga tawo.

Niadtong tungura nakuha sa kapolisan ang mga pirated VCD ug DVD ug gikatakdang gub-on.

Atol sa pagpangronda, ang mga photographers sa The Freeman/Banat News nakakuha'g mga hulagway sa mga tawong samtang nagpunay og karga sa sakyanan ang mga polis, nag-iyahay usab sila og pangawat sa mga sinakmit nga mga pirated VCD ug DVD.

Gisusi na karon sa Homicide Section kung si kinsa ang maong vendor nga mibalya sa pultahan ngadto kang Espinosa alang sa pagpasaka og kaso.