Atty. Monteclar ilubong karon

Ihatod na sa kapahulayang dayun karong adlawa ang patay'ng lawas ni Atty. Crisologo Rubio Monteclar, kanhi sakop sa hunta probinsiyal sa Sugbo.

Si Monteclar, 78 anyos, namatay sa multiple organ failure sa Perpetual Succour Hospital niadtong Hulyo 10 ug gihaya sa Rolling Hills Memorial Chapel sa Banilad, dakbayan sa Sugbo.

Ang patay'ng lawas ni Monteclar gidala kagahapon sa hapon sa Kapitolyo ug gibilaran tibuok gabii sa social hall isip pagtahud sa iyang pagkasakop sa hunta probinsiyal ubos sa administrasyon ni kanhi Gobernador Emilio "Lito" Osmeña.

Karong udto dad-on ang patay'ng lawas ni Monteclar sa simbahan sa Guadalupe, dakbayan sa Sugbo diin siya sakop sa Knights of Columbus, alang sa usa ka requiem mass.

Human sa misa, dad-on siya sa Cebu Memorial Park diin ipahigayun ang paglubong sa patay'ng lawas ni Monteclar.

Si Monteclar ang giilang amahan sa isla sa Malapascua sa lungsod sa Daanbantayan diin maoy iyang yutang natawhan.

Si Monteclar ug iyang kapikas nga si Irene dunay unom ka mga anak.

Duha niini mao sila si Dr. Allan Monteclar, hepe sa pediatric department sa Vicente Sotto Memorial Center samtang si Atty. Alex Monteclar, dean sa college of law sa University of San Carlos.