Vendor sa Carbon gipatay

Patay ang usa ka vendor og utanon diha sa Carbon market human kini pusila diha sa dalan F. Gonzales, Sto. Niño ning dakbayan niadtong gabii sa adlaw'ng Martes.

Ang biktima giilang si Darnel Catalan, 31, residente sa Bayong, Tisa ning dakbayan ug nanginabuhi pagtinda og utanon diha sa maong merkado.

Samtang naangol usab sa saag nga bala ang laing tindera nga si Amparo Bernil, 50, nga residente sa gikahitaboan.

Base sa imbestigasyon sa Homicide Section ang biktima kasamtangang naglakaw diha sa nahisgutang dalan dihang kalit nga giduol sa usa ka wala mailhing lalaki dayon gipusil gamit ang wala matinong kalibre sa armas de fuego makadaghang higayon.

Ang biktima nakabaton og samad pinusilan diha sa iyang walang tampihak, tuong bahin sa tangkugo, tuong bahin sa dughan ug tuong bahin sa likod, gidudahang human maigo ang biktima giusban pa kini sa suspek.

Ang biktima naabtang nagtuwad diha sa tunga-tungang bahin sa kalsada ug wala nay kinabuhi. Samtang si Bernil kinsa nagtinda diha sa daplin sa dalan naigo usab diha sa iyang likod ug gidala sa Cebu City Medical Center.

Walay nakuhang basiyo sa bala diha sa crime scene ang kapolisan hinungdan nga gituuhang nigamit og rebolber ang suspek pagpatay sa biktima.