Revamp sa MCWD gitinguha sa mayor

Gitinguha ang halapad nga lahugay sa management sa Metro Cebu Water District (MCWD) nga gitumong aron makurihian ang nadiskubrihan nga mismanagement sa maong buhatan.

Si Mayor Tomas Osmeña maoy nagtinguha nga matigayon ang revamp sa management sa MCWD aron matarong na ang operasyon sa maong buhatan ilabi na ang pagtubag sa suliran sa kakulang sa suplay sa tubig dinhi sa Metro Cebu.

Atol sa press conference kagahapon sa udto gipadayag ni Osmeña nga wala na siya maka-uyon niining pabor-pabor nga desisyon sa management ug moresulta pa sa pag-impluwensya sa mga programa ug reporma nga irekomendar sa mga sakop sa board sa MCWD.

Walay lipud-lipod nga gibulgar ni Osmeña ang gihulagway niya nga depektoso nga mga desisyon sa management sa MCWD sama sa padayong pagpabor sa deal niini tali sa Ayala Corp. nga maoy mosuplay og tubig sa tag P25 kada metro kubiko.

Kining maong transaksyon hugot nga gibabagan ni Osmeña gumikan kay alang niya dili kini makatarunganon gumikan kay duna pay ubang mga supplier ang mitanyag og deal nga mas barato ang presyo nga naglakip sa Atlas Group, Pepito Alvarez ug uban pa nga nagtanyag og mas barato nga suplay sa tubig apan wala pabori sa management sa MCWD.

Gikabalak-an sa mayor nga mosamot ang suliran sa kakulang sa suplay sa tubig dinhi sa Metro Cebu kun mohinayon gyud ang Mactan Rock sa paghunong na og suplay sa tubig sa Mactan ug Cordova tungod kay mapugos man ang MCWD pagsuplay og tubig ning nahisgutang mga lugar.