5-anyos-nalatayan sa bus

Patay ang usa ka 5 anyos nga batang babaye human kini malatayi sa ligid sa bus de pasaheroan sa dihang mitabok sa pikas dalan sa miaging udto diha sa Sayaw Beach sa Sayaw, Barili.

Katunga sa lawas nalatayan sa ligid ug napiyapi ang ulo nga namilit ang utok sa sementadong dalan sa biktimang giila nga si Genica Pen Marabillas, lumolupyo sa maong lugar ug tinun-an sa day care.

Ang nakaligis nga bus mao ang Chan Transit nga nagtangag sa plaka GVG 514 nga gipanag-iya ni Allan Chan ug gimaneho sa drayber nga si Rodulfo Aledo Alipayan, 45, minyo, nagpuyo sa Sitio Tayong Gibuangan, Barili.

Si PO3 Zalde Urillo sa Barili Police station sa pakighinabi sa Banat News, nagkanayon ang biktima gikan migawas sa eskuylahan ug mikuyog kini sa inahan sa iyang classmate paingon unta sa beach resort diin nagpaabot ang mga ginikanan sa biktima aron magdungan sa paniudto uban usab sa apohang lalaki.

Apan sa dihang milabang na ang gikuyogan sa bata uban sa duha niini ka anak, naulahi ang biktima sa pagtabok sa pikas dalan ug natayming usab nga nagpadulong si Alipayan nga may gisundan nga multicab.

Matud ni PO3 Urillo nga wala mabantayi sa drayber ang bata nga milabang kini hinungdan sa pagkaigo sa atubangang habig sa drayber ug nalagpot apan didto malatayi sa luyong bahin sa bus.