Ang biktima nga si Inday,22, lumad nga taga habagatang bahin sa lalawigan sa Sugbo gikuyugan pa sa mga suspek ngadto sa ilang ahensya nga Lerex Manpower Agency sa dalan F. Llamas sa Punta Prinsesa kay kuno buot nila kining pailisan.
Apan ang biktima misumbong sa iyang agalong si Lemario Manugas sa nahitabong paglugos kaniya sa usa ka Iranian national ug anak niining minor de edad (mga ngan gipugngan) niadtong Hulyo 16 samtang siya naghugas og plato.
Matud pa sa biktima sa kapolisan niadto pang Hulyo 15 siya nagsugod sa iyang trabaho sa mga suspek. Nianang pagkahapon na sa Hulyo 16 nakamatikod na siya sa lain kaayong tinan-awan sa mga suspek nga abayan pa og agik-ik sa duha samtang siya naghugas og plato.
Kalit lang siyang gigakos sa amahan ug giguroy padulong sa bintana dayong hulga kaniya pag-ingon og "Piyait must die!" dayon pugsanong mipahigda kaniya diha sa higdaanan ug gisugdan og lugos atubangan sa anak sa suspek nga 17 anyos.
Ang anak nga 17 nga Iranian gikatahong maoy mipuli sa amahan niini human lugosa ang biktima gamit ang iyang tudlo.
Niadtong Lunes sa buntag giusban siya og lugos sa amahang Iranian. Pagkahapon ang manag-amahang suspek midala sa biktima ngadto sa buhatan sa ahensya diin maoy kompaniyang gitrabahoan sa biktima sa tuyo nga iuli kini ug buot nilang pailisan.
Apan ang manager sa Lerex Manpower Agency human makahibalo sa gidangatan sa biktima daling mitawag og polis, ang amahang Iranian kinsa nakapanimaho sa umaabot nga polis daling miikyas ug gibiyaan ang anak.
Ang grupo ni SPO4 Joselito Palang sa Punta Prinsesa Police Station maoy midakop sa 17 anyos nga Iranian, samtang gidala sa Family Juvenile and Gender Sensitivity Section ang biktima alang sa pagpailawom kaniya sa medical examination.