Mi-rape sa 9-anyos gihukmang reclusion perpetua

Gihukman nga mabilanggo sa tibuok kinabuhi ang usa ka lalaki nga milugos sa nuybe-anyos nga bata.

Si Raul Sato mibutyag kagahapon sa mga tigbalita nga dili siya "guilty" sa maong krimen tungod kay dunay personal nga bangi ang iyang pamilya ug ang pamilya sa bata.

Ang insidente sa lugos nahitabo niadtong Septiyembre 2004 sa lungsod sa Carcar.

Ang bata mibutyag nga gidala siya ni Sato sa usa ka abandonadong payag uban sa iyang ig-agaw nga batang babaye.

Si Sato mimando sa duha ka bata nga maghubo sa ilang mga sinena ug gimolestiya niini ang biktima.

Human og molestiya ni Sato sa biktima gihatagan niya kini og P5 ug gibaharan nga patyon kun mosumbong kini sa iyang gibuhat.

Apan ang maong pasangil gihimakak ni Sato dihang nagpadayon ang hearing sa kaso ug nagkanayon kini nga nanagat siya dihang nahitabo ang maong insidente.

Apan ang bata ug ang ig-agaw niini mitumbok ni Sato nga milugos sa biktima hinungdan nga gihukman sa korte og reclusion perpetua.

Si Sato pabayron og P50 mil nga civil liability, P10 mil sa moral damages ug P5 mil para sa exemplary damages ngadto sa biktima.