Si Ponce gikuyugan sa hepe sa kapolisan sa lungsod sa Sibonga, Supt. Tito Satera, ug barangay kapitan Floro Montalla sa pagkuha sa gitagoan sa suspetsado nga si Nicanor "Canorio" Antiga, 23, ulitawo, sa barangay Cantolaroy lungsod sa Sibonga.
Gipangayo ni Antiga ngadto kang Ponce sa iyang pagsurender mao nga dili siya hilabtan.
Aron pagseguro, gipresentar kagahapon ni Ponce si Antiga kang Gobernador Gwendolyn Garcia ug Cebu Police Provincial Office director, Sr. Supt. Vicente Loot, una pa gibalhug sa Cebu Provincial Detention and Rehabilitation Center.
Gipasalig ni Garcia ngadto kang Antiga nga tarung ug makiangayon ang CPDRC sa mga piniriso kaysa magtago-tago.
Matud pa ni PO3 Arnold Abenir, imbestigador sa kapolisan sa lungsod sa Argao nga duha ka standing warrant of arrest sa kasong murder ang giluwatan ni Judge Maximo Perez batok kang Antiga.
Gawas kang Amarillo, usa ka Erwin Carillo nga taga Apo, Argao ang giingong gipatay usab ni Antiga niadtong Mayo 2002.
Matud pa ni Abenir nga gawas sa duha ka kasong murder, daghan pang kaso si Antiga nga wala mapasakai og kiha sa mga tagtungod sa biktima.
Sumala pa ni Abenir nga base sa ilang nadungog, bayranan si Antiga sa pagpapatay.
Si Antiga dunay upat ka kauban nga suspek sa pagpatay kang Amarillo samtang tulo na niini ang nasiko ug usa na lang ang nagtago-tago nga taga barangay Anahaw, Argao.
Dugang pa ni Abenir nga walay usa sa mga suspetsado nga nitug-an sa mastermind sa mga kasong pagpatay nga ilang giatubang.