Karong buntag ipahigayon ang promulgation sa kasong grave threats nga gi-atubang ni Jonah John Rodriguez sa sala ni MTCC Judge Oscar Andrino.
Gipadayag ni Osmeña atol sa press conference kagahapon sa udto nga dili gyud siya makapasaylo kang Rodriguez bisan pa og modangop kini sa iyang buhatan sa City Hall aron personal nga mangayo og pasaylo.
Kini tungod kay gihulagway sa mayor nga usa lang kini ka pag-inartista kun buhaton man ni Rodriguez ang pagdangop sa iyang buhatan ug mangayo og pasaylo.
Personal nga gihatagan og kopya sa mayor ang mga sakop sa media kagahapon sa mga binastos nga messages nga gipadala ni Rodriguez ngadto kang Margot.
Gitug-an sa mayor nga iyang gitambagan si Margot nga subling basahon ang mga gipadala niini nga mga binastos nga text messages dihang gipahibalo ni Rodriguez nga andam na siyang mangayo og pasaylo bugti ang pagsibog sa kaso.
Nakahipos og ebidensya ang kampo ni Osmeña sa mga text messages ni Rodriguez human ma-trace sa NBI ang celphone number 09173228428 nga gipanag-iya sa usa ka Annabele Rama.
Si Annabele Rama maoy mibarog nga saksi human giangkon niini nga iya ang maong numero apan ang iyang higala nga si Rodriguez maoy nigamit niini dihang nipadala kini sa mga binastos ug pagpanghulga nga text messages.