Misuway'g dinamit sa polis

Nasikop sa kapolisan sa Daan Bantayan ang amahan ug anak kinsa gipasanginlang migamit og dinamita sa ilang pagpangisda ug gipasanginlan usab nga misuway sa paglabay og dinamita sa mga polis nga midakop kanila niadtong Biyernes sa buntag diha sa Sityo Dapdap, Talisay sa maong lungsod.

Nagtingkagol sa Daan Bantayan detention cell si Angelito Pepito ug ang anak niining si Dindo, 21-anyos, pulos mga residente sa nahisgutang lugar.

Si PO2 Mamerto Gastador sakop sa intelligence operatives sa kapolisan sa lungsod mibutyag kagahapon sa Banat News nga aduna silay nadungog nga sunod-sunod nga buto gikan sa lawod hinungdan nga ilaha kining gisusi ug pag-abot nila sa lugar mga napulo ka mangisdaay lakip na ang amahan ug anak ang nagtibwaag og biya sa lugar.

Apan si Angelito ug Dindo nabiyaan sa ilang mga kauban tungod kay walay makina ang gisakyan niining sakayan.

Si Gastador mipasangil ni Dindo nga mihata og labay kanila sa sinansan nga dinamita sulod sa long neck apan mipahigayon og usa ka warning shot ang maong polis hiungdan nga gilabay sa suspetsado diha sa lawod ang gigunitan niining dinamita.

Matud ni Gastador nga wala na nila makuha ang dinamita nga ilabay unta ni Dindo kanila tungod kay dali kaayo kining natidlom ilawom sa dagat.

Show comments