Tom saludo ni dok mitestigo vs Ecleo

Saludo si Mayor Tomas Osmeña sa gipakitang kaisog sa cardiologist nga si Dr. Generoso Matiga nga mitug-an sa korte nga himsog ang panglawas ni PBMA leader Ruben Ecleo Jr. ug dili tinuod nga masakiton ug mahimo na kining ibalhog og balik sa bilanggoan.

Si Matiga maoy medical specialist nga nagsuperbisar sa gihimong paghiling sa panglawas ni Ecleo didto sa Perpetual Soccour Hospital niadtong Hunyo 22.

Si Osmeña mipasidaan ni Matiga nga magmatngon kini sa tanan niining mga lakaw human sa giluwatan niining tinud-anay nga kahimtang sa panglawas ni Ecleo gumikan kay gihulagway sa mayor nga peligroso nga tawo ang lider sa PBMA lider.

Apan giinsister ni Attorney Orlando Salatandre, abogado ni Ecleo nga wala pa siya matagbaw sa maong gipagawas nga finding kabahin sa kahimtang sa panglawas sa iyang kliyente.

Kini tungod kay matud ni Salatandre dihang nahinabi sa Banat News nga giangkon man ni Matiga nga dili pa gyud hingpit nga normal ang heart condition sa iyang kliyinte ug nagkinahanglan pa kini sa mas lawom pang eksaminasyon.

Unya sa Hulyo 28 ipadayon ni Salatandre ang cross examination kang Matiga aron gyud mahibaw-an ang tinuoray'ng kondisyon sa panglawas ni Ecleo.

Nasayran nga gitugotan sa korte nga makapyansa og P1 milyon si Ecleo niadtong sayong bahin sa tuig 2004 human gipadayag sa private doctor niini gikan sa Chong Hua Hospital nga susama sa walking time bomb ang lider sa PBMA nga mahimong mamatay bisan unsang orasa.

Ang kasong parricide nga giatubang ni Ecleo naggumikan sa kamatayon sa kaugalingong asawa niini nga si Alona Bacolod Ecleo niadtong tuig 2002 diin mao kini gitumbok nga mastermind sa krimen.