Transfer ni Leyson sa Talisay tukionon

Mopahigayon sa sunod semanar og tigum ang mga miyembro sa Election Registration Board sa dakbayan sa Talisay aron tukion kun aprobahan ba ang aplikasyon ni konsehal Gabriel Leyson sa dakbayan sa Sugbo nga mobalhin og rehistro sa naasoy'ng siyudad.

Si Election Officer Corazon Moran nagkanayon nga sugod sa Hulyo 17, ang board magtigum aron tukion ang mga isyu diin usa niini ang pag-aplay ni Leyson isip residente sa Talisay.

Kahinumduman nga si Leyson mibutyag sa iyang planong pagdagan sa piniliay karong 2007 isip mayor sa Talisay.

Giangkon usab ni Leyson nga usa siya ka Talisaynon tungod kay diha siya maggikan sa maong dakbayan ug gani nanag-iya siya og mga lote sa lugar.

Si Leyson nahimong konsehal sa dakbayan sa Sugbo sulod sa duha ka termino og usa siya ka rehistradong botante sa Cogon, Ramos dakbayan sa Cebu.

Niadtong Mayo giduso ni Leyson ang iyang residential aplikasyon sa Comelec ug base sa maong application nga kanhi siya residente sa Lagtang sulod sa upat ka tuig ug mibalik siya og puyo sa lugar niadtong Hunyo aron pagkumpleto sa iyang aplikasyon.

Apan gidemalas si Leyson tungod kay nadaot ang capturing machine sa Comelec dihang miduso na siya sa iyang aplikasyon.

Si Moran nagkanayon nga ang Comelec igo lang magpatuman sa balaod kun maaprobahan ang aplikasyon ni Leyson ang dili makauyon sa maong pag-aprobar nga gustong mokwestiyon sa kridibilidad ni Leyson isip residente sa Talisay pwedeng makaduso og petition aron dili kini maapil sa talaan sa mga mokandidato karong moabot nga piniliay.