Dunay laing polis nga nalambigit sa drogas

Laing mga aktibong polis ug nag-awol nga mga polis ang gipanid-an karon sa Cebu City Police Office gumikan sa kalambigitan sa iligal nga drogas sumala pa sa usa ka opisyal sa kapolisan.

Kini human madakpi ang duha ka mga polis diin usa kanila sakop sa San Nicolas Police station atol sa buybust operation diha sa Mambaling nga nalambigit og balor P450,000 nga deal sa shabu.

Si Sr.Insp. George Ylanan sa pakighinabi sa Banat News nagkanayong dunay mga polis nga aktibo pa sa serbisyo ug mga nag-awol na sa ilang pagkapolis ang ila karong gipanid-an gumikan sa kalambigitan sa iligal nga drogas.

Si Ylanan nagkanayon nga kining maong grupoha dunay koneksyon sa mga nadakpang mga polis apan wala ibutyag ang ilang mga pangalan sanglit wala pay ebidensyang nakuha gikan sa maong mga polis.

Niadtong milabay'ng Martes sa hapon nasikop nila ni Ylanan sila si PO1 Aldwin Vicada nga sakop sa San Nicolas police station ug kanhi sakop sa Regional Mobile Group nga si PO1 John Rey Catiri kinsa mi-awol sukad pa niadtong 2001.

Sila si Vicada ug Catiri manag-batch mate atol sa ilang pagsulod sa pagkapolis niadtong 1997. Matud pang Ylanan nga dunay mga ka-batch ang duha nga karon ilang nasutang nalambigit usab sa maong iligal nga kalihukan.

Duna say ubang gidudahang polis nga dili nila ka-batch sa 1997 apan nakauban nila ni Vicada sa ilang kanhi gidestinohang police station o ba kaha police units.