Navy recruitment team nia sa Cebu

Nia sa Sugbo sunod semana ang mobile recruitment team sa Philippine Navy aron manguha og mga bag-ong naval officers gikan sa ubang dapit sa nasud gawas sa Metro Manila.

Lima ka adlaw ang maong kalihukan sugod sa Hulyo 17 hangtud sa Hulyo 21 diha sa NFC Gymnasium, Headquarters Naval Forces Central Philippines sa barangay Canjulao dakbayan sa Lapu-Lapu.

Gikinahanglan mao nga usa ka natural born Filipino citizen dili minyo, edad 21 ngadto sa 29 anyos, gradwado sa kolehiyo, 5'4" ang gitas-on sa lalake ug 5'2" sa babaye ug walay deperensiya sa panglawas nga mahimong babag sa pagbansay-bansay.

Nagpadayon karon ang processing ug registration sa mga aplikante sa headquarters sa dakbayan sa Lapu-Lapu ingon man sa Headquarters Naval Reserve Center Eastern Visayas sa may Arellano boulevard, dakbayan sa Sugbo.

Ang provincial examinations magsugod sa Hulyo 17, 2006 sa alas 8 sa buntag NFC Gymnasium sa Headquarters Naval Forces Central sa dakbayan sa Lapu-Lapu samtang ang mga walk-in applicants dawaton lang sa unang adlaw sa provincial exams.

Ang malampusong aplikante nga mahimong commissioned officers sa Philippine Navy ang magdawatan og P16,026 nga basic salary, additional allowances, cash gifts ug bonuses ug ubang benepisyo ug pribilihiyo dili lang sa opisyal lakip na usab sa iyang pamilya.