Biliran-Cebu link palamboon

BILIRAN — Naningkamot karon ang mga opisyal sa probinsya nga mapalambo pag-ayo ang patigayon sa turismo niini pinaagi sa pagtubag sa panginahanglan sa mga turista ilabi na gayud ang gikan sa dakbayan sa Sugbo.

Si Mayor Gerardo "Gerry" Espina, Sr. sa lungsod sa Naval miingon nga mao kini karon ang ilang gipalapdan nga kalihukan.

Matud pa ni Mayor Espina nga si Gobernador Rogelio Espina sa probinsya ingon man ang iyang anak nga si Kongresista Gerardo Espina Jr. nakauyon kabahin niini.

"Mao nay nakanindot kon kauban ra ang tanang naghupot sa katungdanan sa gobyerno sa usa ka probinsya," pasabot ni Mayor Espina.

Midugang ang mayor nga kon adunay mga maanindot nga plano ang iyang buhatan iya gayud kini nga iduso ngadto sa gobernador nga walay babag.

Samtang kon adunay gahin nga tinguha niya nga matabangan sa iyang anak nga kongresista wala usab kakulian kay mahatagan man dayon kini sa igong pagtagad.

Usa sa iyang nakita nga makatabang pag-ayo sa kalamboan sa turismo sa ilang probinsya mao ang pakigdugtong niini sa probinsya ug sa probinsiya sa Sugbo.